O presidente da Deputación de Lugo, José Tomé Roca, e a alcaldesa de Trabada, Mayra García Bermúdez, asinaron un convenio de colaboración polo cal a institución provincial achegará 44.000 euros para acometer melloras nas instalacións e equipamento dos vestiarios e ximnasio do polideportivo deste concello mariñano.
Os traballos consistirán en actuacións de acondicionamento da zona dos vestiarios e o ximnasio, así como da dotación de equipamento básico para o bo funcionamento desta instalación deportiva.
“Por fin podemos acometer estas melloras, que son unha demanda histórica deste concello. Levábamos dous anos solicitando axudas á Xunta de Galicia para facer estes traballos, pero rexeitáronnolas. Trátase dunha dotación fundamental para os veciños e as veciñas de Trabada e agora, grazas á Deputación, poderán desfrutala”, explicou García Bermúdez.
Pola súa banda, o presidente subliñou que “a Deputación é o Concello dos Concellos, e como Concello grande ten como prioridade colaborar e axudar na medida das súas posibilidades para que cada concello da provincia poida desenvolva actuacións que non poden abordar por si sos e que sirvan para dotar de máis e mellores servizos públicos aos veciños e veciñas”. Nese senso, Tomé Roca garantiu a vontade da Deputación de seguir apoiando ao Concello para mellorar a vida da veciñanza de Trabada.
